قصيدة ممنوع

ممنوع من السفر
ممنوع من الغنا
ممنوع من الكلام
ممنوع من الاشتياق
ممنوع من الاستياء
ممنوع من الابتسام

.....................

وكل يوم فى حبك
تزيد الممنوعات
وكل يوم احبك
اكتر من اللى فات
...................
حبيبتى يا سفينه
متشوقه وسجينه
مخبر فى كل قعده
عسكر فى كل مينا
يمنعنى لو اغير
عليكى او اطير
اليكى واستجير
بحضنك او انام
فى حجرك الوسيع
وقلبك الربيع
اعود كما الرضيع
بحرقة الفطام

.......................
حبيبتى يا مدينه
متزوقه وحزينه
فى كل حاره حسره
وف كل قصر زينه
ممنوع من انى اصبح
بعشقك....او ابات
ممنوع من المناقشه
ممنوع من السكات
وكل يوم فى حبك
اكتر من اللى فات